(ត្បូងឃ្មុំ)៖ រដ្ឋបាលខេត្តត្បូងឃ្មុំ និងមន្ទីរវប្បធម៌ និងវិចិត្រសិល្បៈខេត្ត បានប្រារព្ធទិវាវប្បធម៌ជាតិ ៣មីនា លើកទី២៨ ឆ្នាំ២០២៦ ក្រោមប្រធានបទ «យុវជនដើម្បីវប្បធម៌ជាតិ» ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ ស្ថិតនៅសាលប្រជុំរំដួល សាលាខេត្ត នៅព្រឹកថ្ងៃទី២៥ ខែមីនា ឆ្នាំ២០២៦ នេះ ដោយមានការអញ្ជើញចូលរួមពីថ្នាក់ដឹកនាំខេត្ត មេញ្ជាការកងកម្លាំងប្រដាប់អាវុធ ប្រធានពន្ធនាគារខេត្ត ថ្នាក់ដឹកនាំមន្ទីរអង្គភាពជុំវិញខេត្ត ព្រមទាំងមន្ត្រីរាជការ លោកគ្រូអ្នកគ្រូ សិល្បៈករ និងសិស្សានុសិស្សយ៉ាងច្រើនកុះករ។
ក្នុងឱកាសនោះ លោក កួ ហុក ប្រធានមន្ទីរវប្បធម៌ និងវិចិត្រសិល្បៈខេត្ត បានឡើងធ្វើរបាយកាណ៍ស្វាគមន៍ និងបានលើកឡើងថា ការប្រារព្ធទិវានេះ ធ្វើឡើងតាមអនុសាសន៍ដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីដាស់ស្មារតីកូនខ្មែរគ្រប់ជំនាន់ ពិសេសយុវជន ឱ្យចងចាំ និងយល់ដឹងពីតម្លៃមិនអាចកាត់ថ្លៃបាននៃបេតិកភណ្ឌវប្បធម៌ទាំងរូបី និងអរូបី។ លោកប្រធានមន្ទីរ បានគូសបញ្ជាក់ពីសក្តានុពលវប្បធម៌ដ៏សម្បូរបែបរបស់ខេត្តត្បូងឃ្មុំ ដែលមានស្ថានីយបុរេប្រវត្តិសាស្ត្រ ៣២កន្លែង ប្រាសាទបុរាណ ៩កន្លែង និងក្រុមសិល្បៈមហាជនចំនួន ២១៦ក្រុម ដែលកំពុងសកម្មក្នុងការថែរក្សាដួងព្រលឹងជាតិ។
ក្នុងឱកាសអបអរសាទរទិវាវប្បធម៌ជាតិ ៣មីនា លើកទី២៨ ឆ្នាំ២០២៦ ក្រោមប្រធានបទ «យុវជនដើម្បីវប្បធម៌ជាតិ» នាពេលនេះ ឯកឧត្តម ប៉ែន កុសល្យ អភិបាលខេត្តត្បូងឃ្មុំ បានមានប្រសាសន៍ថា ក្នុងបរិបទដែលវប្បធម៌បរទេសកំពុងហូរចូលយ៉ាងគំហុកតាមរយៈបណ្ដាញសង្គម យុវជនត្រូវតែជាអ្នកចម្រាញ់ និងជាខែលការពារអត្តសញ្ញាណជាតិ។ ឯកឧត្តមបានក្រើនរំលឹកថា «វប្បធម៌ សិល្បៈ គឺជាព្រលឹងជាតិ» ប្រសិនបើក្មួយៗយុវជនមិនរួមគ្នាថែរក្សាទេ នោះអត្តសញ្ញាណរបស់យើងនឹងត្រូវរលាយបាត់បង់ ឬត្រូវបានគេលួចបន្លំយកទៅបកស្រាយខុសពីការពិត ។
ឯកឧត្តមអភិបាលខេត្ត បានលើកទឹកចិត្ត ដល់ស្រទាប់យុវជន ជាសិល្បករ និងសិស្សានុសិស្ស ត្រូវប្រើប្រាស់ចំណេះដឹងផ្នែកឌីជីថល ដើម្បីផលិតមាតិកា (Content) វីដេអូខ្លីៗ ឬរូបភាពស្អាតៗពីវប្បធម៌ខ្មែរ ផ្សព្វផ្សាយទៅកាន់ពិភពលោក ដែលនេះគឺជាវិធីសាស្ត្រដ៏មានប្រសិទ្ធភាពបំផុត ក្នុងការការពារមរតកដូនតា ពីការរំលោភបំពាន និងការប៉ុនប៉ងលួចបន្លំពីសំណាក់មជ្ឈដ្ឋានខាងក្រៅ។
ឯកឧត្តម ប៉ែន កុសល្យ អភិបាលខេត្ត បានថ្លែងការកោតសរសើរ និងវាយតម្លៃខ្ពស់ ដល់មន្ទីរវប្បធម៌ និងវិចិត្រសិល្បៈខេត្ត ដែលបានខិតខំអភិរក្សសិល្បៈក្នុងមូលដ្ឋាន និងបានអំពាវនាវឱ្យគ្រប់អង្គភាពពាក់ព័ន្ធ សូមបន្តជួយជ្រោមជ្រែងដល់យុវជន ដើម្បីឱ្យពួកគេមានមោទនភាពចំពោះជាតិខ្លួន ដោយមិនប្រកាន់និន្នាការនយោបាយ ឬសាសនាឡើយ។
ឯកឧត្តម ប៉ែន កុសល្យ បានផ្ញើសារជូនពរដល់អង្គពិធីទាំងមូល និងសង្ឃឹមយ៉ាងមុតមាំថា ស្មារតីនៃទិវាវប្បធម៌ជាតិឆ្នាំ ២០២៦ នេះ នឹងក្លាយជាកម្លាំងចលករថ្មីមួយទៀត ក្នុងការជំរុញឱ្យខេត្តត្បូងឃ្មុំ ក៏ដូចជាប្រទេសកម្ពុជាទាំងមូល រក្សាបាននូវភាពរុងរឿងនៃវប្បធម៌ដែលជាមរតកមិនចេះរីងស្ងួត៕
