(ត្បូងឃ្មុំ)៖ ក្នុងស្មារតីពង្រឹងសន្តិសុខសង្គម និងការអនុវត្តច្បាប់យ៉ាងម៉ឺងម៉ាត់ ឯកឧត្តម ប៉ែន កុសល្យ អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តត្បូងឃ្មុំ នៅព្រឹកថ្ងៃទី២៩ ខែមេសា ឆ្នាំ២០២៦ នេះ បានដឹកនាំផ្ទាល់នូវកម្លាំងចម្រុះខេត្ត សហការជាមួយកម្លាំងជំនាញនៃនាយកដ្ឋានព្រហ្មទណ្ឌ ក្រសួងមហាផ្ទៃ ចុះអនុវត្តប្រតិបត្តិការរដ្ឋបាលចំហ ដើម្បីត្រួតពិនិត្យ និងបង្ក្រាបទីតាំងសង្ស័យពាក់ព័ន្ធនឹងបទល្មើសបច្ចេកវិទ្យា (Online Scam) នៅក្នុងភូមិសាស្ត្រស្រុកពញាក្រែក។
ប្រតិបត្តិការដ៏មានសន្ទុះនេះ មានការចូលរួមពីកម្លាំងនគរបាលខេត្ត កងរាជអាវុធហត្ថខេត្ត និងមន្ត្រីជំនាញពីក្រសួងមហាផ្ទៃ ដោយមានការសម្របសម្រួលនីតិវិធីពីតំណាងអយ្យការអមសាលាដំបូងខេត្ត។ កម្លាំងចម្រុះបានធ្វើការរុករក និងត្រួតពិនិត្យយ៉ាងហ្មត់ចត់តាមខ្នងផ្ទះល្វែង វីឡា និងអគារនានា ក្នុងភូមិត្រពាំងផ្លុងទី១ ឃុំត្រពាំងផ្លុង ដែលជាតំបន់ជាប់ព្រំដែនកម្ពុជា-វៀតណាម។
ជាលទ្ធផលបឋមនៃប្រតិបត្តិការនេះ សមត្ថកិច្ចបានរកឃើញ៖
១. ទីតាំងចំនួន ០១ កន្លែង៖ មានសកម្មភាពលួចលាក់ប្រព្រឹត្តបទល្មើសបច្ចេកវិទ្យា (Online Scam) ជាក់ស្តែង។
២. ទីតាំងចំនួន ០២ កន្លែង៖ រកឃើញមានជនបរទេសស្នាក់នៅប្រមូលផ្ដុំគ្នា ដែលតម្រូវឱ្យមានការត្រួតពិនិត្យឯកសារ និងសកម្មភាពឱ្យបានលម្អិត។
នាឱកាសនោះ ឯកឧត្តម ប៉ែន កុសល្យ បានបញ្ជាក់ពីគោលជំហរដាច់ខាតក្នុងការគាំទ្រ និងអនុវត្តតាមបទបញ្ជារបស់រាជរដ្ឋាភិបាល ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការកម្ចាត់រាល់ការឆបោកតាមប្រព័ន្ធអនឡាញ។ ឯកឧត្តមបានសង្កត់ធ្ងន់ថា៖ «ខេត្តត្បូងឃ្មុំ មិនមែនជាទីជម្រកសុវត្ថិភាពរបស់ជនល្មើសឡើយ តែគឺជាឋាននរករបស់ឧក្រិដ្ឋជនទាំងឡាយណា ដែលបម្រុងមកបង្កគ្រោះថ្នាក់ដល់សន្តិសុខសង្គម»។
បន្ថែមលើសពីនេះ រដ្ឋបាលខេត្តបានដាក់ចេញនូវវិធានការណ៍ក្តៅ ដោយដាក់កម្លាំងប្រចាំការ ២៤ ម៉ោង លើ ២៤ ម៉ោង នៅតាមច្រកចេញ-ចូលនៃទីតាំងគោលដៅសរុបចំនួន ០៩ កន្លែង (ក្នុងនោះមានកាស៊ីណូមានអាជ្ញាបណ្ណ ០៤ កន្លែង និងការដ្ឋានសាងសង់-មណ្ឌលអាជីវកម្ម ០៥ កន្លែង) ដើម្បីទប់ស្កាត់ដាច់ខាតមិនឱ្យមានលំហូរចូលថ្មីនៃជនបរទេស ដែលអាចមកបម្រើឱ្យសកម្មភាពខុសច្បាប់។
ទីតាំងទាំង ០៩ ដែលស្ថិតក្រោមការឃ្លាំមើលយ៉ាងតឹងរ៉ឹងបំផុតរួមមាន៖
* បណ្តាកាស៊ីណូ៖ GRAND GOLDEN, XAMAT, រ៉ុងស៊ីងទីរីសត និង ឃីងរូស្ទ័រអេនធើធេនម៉ិន។
* តំបន់សេដ្ឋកិច្ច និងការដ្ឋាន៖ ទីតាំង ប៉ាយ អ៊ុ, សួនឧស្សាហ៍កម្មផ្លូវ៧២, ការដ្ឋានភូមិបុស្សចេក, ទីតាំង ជើង ពី (GOLDBI RESORT) និង ការដ្ឋាន២៦០។
គិតត្រឹមថ្ងៃទី២៩ ខែមេសា នេះ ស្ថានការណ៍ទូទៅនៅក្នុងភូមិសាស្ត្រដែលបានចុះត្រួតពិនិត្យ គឺស្ថិតក្រោមការគ្រប់គ្រងទាំងស្រុងរបស់សមត្ថកិច្ច ហើយពុំទាន់មានបាតុភាពមិនប្រក្រតីណាមួយកើតឡើងគួរឱ្យកត់សម្គាល់ឡើយ។ សមត្ថកិច្ចជំនាញកំពុងបន្តនីតិវិធីស្រាវជ្រាវ ដើម្បីកំណត់មុខសញ្ញាពាក់ព័ន្ធ និងពង្រីកវិសាលភាពនៃការបង្ក្រាបឱ្យកាន់តែមានប្រសិទ្ធភាពខ្ពស់បំផុត៕
