(ខេត្តត្បូងឃ្មុំ)៖ រយៈពេល ២ថ្ងៃ ចាប់ពីថ្ងៃទី១៦ ដល់ថ្ងៃទី១៧ ខែមករា ឆ្នាំ២០២៦ លោកជំទាវបណ្ឌិត ពេជ ចន្ទមុនី ហ៊ុនម៉ាណែត បានអញ្ជើញជាកិត្តិយសដ៏ខ្ពង់ខ្ពស់បំផុត ក្នុងបេសកកម្មចុះសួរសុខទុក្ខ គោរពវិញ្ញាណក្ខន្ធ និងនាំយកអំណោយសប្បុរសធម៌ ព្រមទាំងថវិកាផ្ទាល់ខ្លួនរបស់សម្តេចធិបតី និងលោកជំទាវបណ្ឌិត ជូនដល់គ្រួសារវីរកងទ័ព និងវីរនគរបាលជាតិពលីចំនួន ៧រូប ដល់គេហដ្ឋានផ្ទាល់ ក្នុងភូមិសាស្ត្រស្រុកត្បូងឃ្មុំ ស្រុកមេមត់ និងស្រុកក្រូចឆ្មារ ខេត្តត្បូងឃ្មុំ។
ក្នុងដំណើរការចុះបំពេញបេសកកម្មមនុស្សធម៌នេះ ក៏មានការអមដំណើរដោយ ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ, ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ និងលោកជំទាវ, ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា និងជាអនុប្រធានក្រុមការងាររាជរដ្ឋាភិបាលចុះមូលដ្ឋានខេត្ត និងលោកជំទាវ និងឯកឧត្តម ផារ៉ា មង្គល ប្រធានក្រុមការងារគណបក្សចុះមូលដ្ឋានស្រុកក្រូចឆ្មារ ថ្នាក់ដឹកនាំថ្នាក់ជាតិព្រមទាំងមន្ទីរ-អង្គភាព និងអាជ្ញាធរដែនដីគ្រប់លំដាប់ថ្នាក់។
ក្នុងឱកាសដ៏ក្តុកក្តួលនោះ លោកជំទាវបណ្ឌិត ពេជ ចន្ទមុនី ហ៊ុនម៉ាណែត បានពាំនាំនូវប្រសាសន៍ផ្ដាំផ្ញើសួរសុខទុក្ខ និងការរំលែកមរណទុក្ខយ៉ាងក្រៀមក្រំបំផុតពីសំណាក់ សម្តេចអគ្គមហាសេនាបតីតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាពិសេស សម្តេចមហាបវរធិបតី ហ៊ុន ម៉ាណែត ជូនចំពោះក្រុមគ្រួសារនៃសព។
លោកជំទាវបណ្ឌិត បានមានប្រសាសន៍សង្កត់ធ្ងន់ថា រាជរដ្ឋាភិបាល និងប្រជាជនកម្ពុជាទូទាំងប្រទេស មិនដែលបំភ្លេចនូវវីរភាពដ៏អង់អាចក្លាហាន និងការលះបង់ដ៏ធំធេងរបស់បងប្អូនវីរកងទ័ព និងវីរនគរបាលជាតិ ដែលបានពលីជីវិតដើម្បីបុព្វហេតការពារបូរណភាពទឹកដី និងសន្តិភាពជូនជាតិមាតុភូមិនោះឡើយ។ ការលះបង់របស់ពួកគាត់ គឺជាគ្រឹះដ៏រឹងមាំនៃសុខសន្តិភាពដែលយើងកំពុងមាននៅថ្ងៃនេះ។
បន្ថែមលើការផ្ដល់អំណោយ និងថវិកាដើម្បីសម្រួលជីវភាពប្រចាំថ្ងៃ លោកជំទាវបណ្ឌិត ក៏បានលើកឡើងពីការយកចិត្តទុកដាក់ខ្ពស់របស់ សម្តេចធិបតី នាយករដ្ឋមន្ត្រី ដែលបានដាក់ចេញនូវគោលនយោបាយគាំពារជាក់ស្ដែងជាច្រើនសម្រាប់គ្រួសារយុទ្ធជនពលី រួមមាន៖
១. ការធានាការសិក្សា៖ ការផ្ដល់អាហារូបករណ៍ដល់កូនៗរបស់វីរយុទ្ធជនពលី ឱ្យបានរៀនសូត្ររហូតដល់បញ្ចប់ថ្នាក់បរិញ្ញាបត្រ។
២. ការគាំទ្រជីវភាព៖ ការផ្ដល់មុខរបរចិញ្ចឹមជីវិត និងការបង្កើតមូលនិធិជួយជីវភាពគ្រួសារ។
៣. ការដោះស្រាយបន្ទុកហិរញ្ញវត្ថុ៖ ការរៀបចំឥណទាន និងការដោះស្រាយបំណុលជូនវីរយុទ្ធជនក្នុងសមរភូមិ។
៤. ការកសាងសហគមន៍៖ ការជួយសម្របសម្រួលជនភៀសសឹក ការបោសសម្អាតមីន និងការកសាងហេដ្ឋារចនាសម្ព័ន្ធនៅតំបន់ដែលរងផលប៉ះពាល់។
លោកជំទាវបណ្ឌិត បានបញ្ជាក់បន្ថែមថា រាជរដ្ឋាភិបាលនឹងបន្តតាមដាន និងជួយសម្របសម្រួលរាល់ការលំបាករបស់គ្រួសារសព ដោយមិនទុកឱ្យគ្រួសារវីរយុទ្ធជនណាម្នាក់ត្រូវបានបោះបង់ចោលឡើយ។ លោកជំទាវក៏បានលើកទឹកចិត្តឱ្យក្រុមគ្រួសារទាំងអស់ រក្សានូវស្មារតីរឹងមាំ និងបន្តចិញ្ចឹមបីបាច់បុត្រធីតាឱ្យក្លាយជាធនធានដ៏ល្អ ដើម្បីបន្តស្នងមរតកវីរភាពពីឪពុកដែលជាវីរជនស្នេហាជាតិ។
សកម្មភាពរយៈពេល ២ថ្ងៃនេះ បាននាំមកនូវភាពកក់ក្តៅយ៉ាងខ្លាំងដល់គ្រួសារនៃសព និងត្រូវបានមហាជនទូទៅកោតសរសើរចំពោះកាយវិការមនុស្សធម៌ និងការដឹងគុណចំពោះអ្នកដែលបានលះបង់ដើម្បីជាតិ៕
