(ខេត្តត្បូងឃ្មុំ)៖ នៅថ្ងៃទី១៧ ខែមករា ឆ្នាំ២០២៦នេះ ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ អមដំណើរដោយ ឯកឧត្តម ម៉ៅ ឌុង អភិបាលរងខេត្ត តំណាងឯកឧត្ដម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានអញ្ជើញជួបសំណេះសំណាល សួរសុខទុក្ខ និងនាំយកអំណោយដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំង សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនដល់គ្រួសារយុទ្ធជនពលីក្នុងសមរភូមិ ដែលកំពុងរស់នៅក្នុងស្រុកត្បូងឃ្មុំ ខេត្តត្បូងឃ្មុំ។
ក្នុងឱកាសដ៏មានអត្ថន័យនោះ ឯកឧត្ដមបណ្ឌិត អ៊ាង សុផល្លែត បានពាំនាំនូវការផ្ដាំផ្ញើសួរសុខទុក្ខដោយក្ដីនឹករលឹកបំផុតពីសំណាក់ប្រមុខថ្នាក់ដឹកនាំ ជូនដល់គ្រួសារយុទ្ធជនពលី និងបានមានប្រសាសន៍សង្កត់ធ្ងន់អំពីគុណូបការៈដ៏មហាធំធេងរបស់កងទ័ពកម្ពុជា។
ឯកឧត្ដមបណ្ឌិតរដ្ឋមន្ត្រី បានលើកឡើងថា រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត ជានិច្ចកាលមិនដែលបំភ្លេចនូវការលះបង់ និងសាច់ស្រស់ឈាមស្រស់របស់វីរយុទ្ធជនយើង ដែលបានពលីជីវិតនៅលើសមរភូមិមុខ ដើម្បីការពារបូរណភាពទឹកដី និងសេចក្ដីសុខសាន្តរបស់ប្រជាជនឡើយ។
ឯកឧត្ដមបណ្ឌិត អ៊ាង សុផល្លែត បានបន្ថែមទៀតថា ការចុះមកដល់ខ្នងផ្ទះនាពេលនេះ គឺជាសក្ខីភាពសបញ្ជាក់ឱ្យឃើញថា រាជរដ្ឋាភិបាលតែងតែនៅក្បែរ និងយកចិត្តទុកដាក់ខ្ពស់បំផុតចំពោះសុខទុក្ខ និងជីវភាពរស់នៅរបស់គ្រួសារកងទ័ព ជាពិសេសគ្រួសារយុទ្ធជនពលី ដែលជាវីរជនស្នេហាជាតិ។
ឯកឧត្ដមបណ្ឌិតរដ្ឋមន្ត្រី ក៏បានបញ្ជាក់ថាយើងនឹងបន្តយកចិត្តទុកដាក់ មើលថែទាំ និងគាំទ្រដល់គ្រួសារវីរជនយើងជានិច្ច ព្រោះពួកគាត់គឺជាគ្រឹះដ៏រឹងមាំនៃសន្តិភាពដែលយើងកំពុងមាននៅថ្ងៃនេះ។
សូមបញ្ជាក់ថា អំណោយដ៏ថ្លៃថ្លារបស់សម្ដេចតេជោ និងសម្ដេចធិបតី ដែលបានប្រគល់ជូនគ្រួសារយុទ្ធជនពលីនាឱកាសនោះ រួមមាន៖
១. គ្រួសារយុទ្ធជនពលី នៅភូមិទួលវិហារ ឃុំជីរោទ៍ទី២ ទទួលបាន ម៉ូតូអាគុយ ០១គ្រឿង និងកង់អាគុយ ០២គ្រឿង។
២. គ្រួសារយុទ្ធជនពលី នៅភូមិសំពៅផុសថ្មី ឃុំជីរោទ៍ទី២ ទទួលបាន កង់អាគុយ ០២គ្រឿង។
ការទទួលបានអំណោយ និងការចុះសួរសុខទុក្ខផ្ទាល់ពីសំណាក់ថ្នាក់ដឹកនាំនាពេលនេះ បានធ្វើឱ្យគ្រួសារយុទ្ធជនពលីសម្ដែងនូវក្ដីរំភើបរីករាយជាពន់ពេក និងបានថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចតេជោ សម្ដេចកិត្តិព្រឹទ្ធបណ្ឌិត សម្ដេចធិបតី និងលោកជំទាវបណ្ឌិត ដែលជានិច្ចកាលតែងតែផ្ដល់នូវភាពកក់ក្ដៅ និងមិនបោះបង់គ្រួសារកងទ័ពចោលក្នុងគ្រាលំបាកឡើយ៕
