(ត្បូងឃ្មុំ)៖ នៅព្រឹកថ្ងៃទី០៩ ខែកុម្ភៈ ឆ្នាំ២០២៦ ឯកឧត្តម ឡុង ធាម ប្រធានក្រុមប្រឹក្សាខេត្ត និងឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានអញ្ជើញជាអធិបតីដ៏ខ្ពង់ខ្ពស់ក្នុង “កិច្ចប្រជុំសាមញ្ញលើកទី២១ អាណត្តិទី៤” របស់ក្រុមប្រឹក្សាខេត្ត ដែលកិច្ចប្រជុំនេះ ត្រូវបានរៀបចំឡើងនៅសាលប្រជុំ (ក) សាលាខេត្តត្បូងឃ្មុំ ដើម្បីពិនិត្យវឌ្ឍនភាពការងារខែមករា និងដាក់ចេញទិសដៅយុទ្ធសាស្ត្រសំខាន់ៗសម្រាប់អភិវឌ្ឍន៍ខេត្ត។
អង្គប្រជុំបានពិនិត្យ និងអនុម័តលើរបៀបវារៈសំខាន់ៗចំនួន ៣ រួមមាន៖
១. ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី២០។
២. ពិភាក្សា និងអនុម័តសេចក្តីព្រាងរបាយការណ៍បូកសរុបលទ្ធផលការងារប្រចាំខែមករា ឆ្នាំ២០២៦ របស់រដ្ឋបាលខេត្ត។
៣. បញ្ហាផ្សេងៗ និងការស្ដាប់របាយការណ៍តាមដានពីគណៈកម្មាធិការនានារបស់ក្រុមប្រឹក្សាខេត្ត។
បន្ទាប់ពីលោក សេង ជ័យវុធ នាយករដ្ឋបាលសាលាខេត្ត បានអានរបាយការណ៍ផ្សព្វផ្សាយ និងរាយការណ៍តាមខ្លឹមសារនៃរបៀបវារៈ រួចមក ឯកឧត្តម ឡុង ធាម ប្រធានក្រុមប្រឹក្សាខេត្ត ក៏បានគូសបញ្ជាក់ ដល់ក្រុមប្រឹក្សាផងដែរថា កិច្ចប្រជុំសាមញ្ញលើកទី២១ អាណត្តិទី៤ នេះ គឺដើម្បីក្រុមប្រឹក្សាខេត្ត ពិនិត្យ ពិភាក្សា និងអនុម័ត នូវសេចក្តីព្រាងកំណត់ហេតុ និងសេចក្តីព្រាងរបាយការណ៍ របស់រដ្ឋបាលខេត្ត លើរបៀបវារៈចំនួន ៣ ចំណុច ។
ឯកឧត្តម ប្រធានក្រុមប្រឹក្សាខេត្ត បានមានប្រសាសន៍សង្កត់ធ្ងន់ថា រាល់ការតាក់តែងឯកសាររដ្ឋបាល ត្រូវតែមានភាពហ្មត់ចត់បំផុត ទាំងអក្ខរាវិរុទ្ធ ឃ្លោងឃ្លា និងខ្លឹមសារ ដើម្បីឱ្យស្របតាមគំរូច្បាប់ដើម។ ឯកឧត្តមបានជំរុញឱ្យសមាជិកអង្គប្រជុំទាំងអស់ បន្តចូលរួមមតិយោបល់ដោយស្មារតីទទួលខុសត្រូវខ្ពស់ សំដៅដោះស្រាយបញ្ហាប្រឈមជូនប្រជាពលរដ្ឋ និងឆ្លើយតបទៅនឹងគោលការណ៍ណែនាំរបស់រាជរដ្ឋាភិបាលឱ្យមានប្រសិទ្ធភាពបំផុត។
នៅក្នុងកិច្ចប្រជុំសាមញ្ញលើកទី២១ អាណត្តិទី៤ របស់ក្រុមប្រឹក្សាខេត្តត្បូងឃ្មុំ ឯកឧត្តម ប៉ែន កុសល្យ អភិបាលនៃគណៈអភិបាលខេត្ត បានលើកឡើងនូវទិសដៅការងារសំខាន់ៗ ចំនួន ៣ ចំណុច ដើម្បីជំរុញការអភិវឌ្ឍ និងរក្សាសណ្តាប់ធ្នាប់ក្នុងខេត្ត រួមមាន ៖
១. ការអភិរក្សវប្បធម៌ និងជំរុញទេសចរណ៍៖ រដ្ឋបាលខេត្តនឹងរៀបចំ “ពិធីចាប់ត្រីតាមបែបបុរាណ” នៅតំបន់បឹងត្រពាំងក្រម ស្រុកមេមត់ នាថ្ងៃទី១៤ ខែកុម្ភៈ ខាងមុខនេះ។ ពិធីនេះធ្វើឡើងដើម្បីថែរក្សាមរតកវប្បធម៌ដូនតា និងបង្កើនភាពទាក់ទាញដល់ភ្ញៀវទេសចរជាតិ និងអន្តរជាតិ ដែលជាផ្នែកមួយក្នុងការជំរុញសេដ្ឋកិច្ចមូលដ្ឋាន។
២. ចលនាខេត្តស្អាត និងបរិស្ថានបៃតង៖ ឯកឧត្តមអភិបាលបានណែនាំដល់គ្រប់មន្ទីរ-អង្គភាពជុំវិញខេត្ត ត្រូវលើកកម្ពស់អនាម័យ និងសោភ័ណភាពនៅតាមទីតាំងការងារ និងទីធ្លាសាធារណៈ។ ជាមួយគ្នានេះ ការចូលរួមដាំដើមឈើលម្អ និងការគ្រប់គ្រងសំណល់ឱ្យបានត្រឹមត្រូវ គឺជាអាទិភាព ដើម្បីប្រែក្លាយខេត្តត្បូងឃ្មុំឱ្យទៅជា “តំបន់បៃតង” ដែលមានបរិស្ថានស្រស់បំព្រង។
៣. ការត្រៀមអបអរសាទរសង្ក្រាន្ត និងការរឹតបន្តឹងសន្តិសុខ៖ សម្រាប់ការត្រៀមពិធីបុណ្យចូលឆ្នាំប្រពៃណីជាតិខ្មែរ រដ្ឋបាលខេត្តនឹងរៀបចំកម្មវិធីកម្សាន្តសប្បាយ រួមមានការលេងល្បែងប្រជាប្រិយ ការបាញ់ទឹក-ពពុះសាប៊ូ និងការតុបតែងភ្លើងពណ៌តាមសួនច្បារសិប្បនិម្មិត។ ទន្ទឹមនឹងការសប្បាយ ឯកឧត្តមបានបញ្ជាដាច់ខាតដល់កងកម្លាំងប្រដាប់អាវុធ ត្រូវបង្ក្រាបឱ្យបាន នូវរាល់សកម្មភាព “ក្មេងទំនើង គ្រឿងញៀន និងល្បែងស៊ីសង” ដើម្បីធានាសុវត្ថិភាពពេញលេញជូនប្រជាពលរដ្ឋ ស្របតាមគោលនយោបាយភូមិ-ឃុំ មានសុវត្ថិភាព។
ជាទីបញ្ចប់ ឯកឧត្តម ឡុង ធាម បានថ្លែងការកោតសរសើរដល់គណៈអភិបាលខេត្ត និងមន្ត្រីរាជការគ្រប់លំដាប់ថ្នាក់ ដែលបានសហការគ្នាជាធ្លុងមួយ ក្នុងការដោះស្រាយបញ្ហាជូនប្រជាពលរដ្ឋ និងរក្សាសន្តិសុខសណ្តាប់ធ្នាប់បានយ៉ាងល្អប្រសើរ។ ឯកឧត្តមបានបង្ហាញជំនឿចិត្តថា តាមរយៈផែនការសកម្មភាពដ៏ច្បាស់លាស់នេះ ខេត្តត្បូងឃ្មុំនឹងបន្តរីកចម្រើនលើគ្រប់វិស័យបន្ថែមទៀត៕
