(ត្បូងឃ្មុំ) ៖ ព្រឹកថ្ងៃទី២៨ ខែកុម្ភៈ ឆ្នាំ២០២៦ ឯកឧត្តម ផារ៉ា មង្គល រដ្ឋលេខាធិការក្រសួងរៀបចំដែនដី នគររូបនីយកម្ម និងសំណង់ បានអញ្ជើញជាអធិបតីក្នុងពិធីសម្ពោធអាគារសិក្សាថ្មី ១ខ្នង កម្ពស់ ២ជាន់ (១២បន្ទប់) និងសមិទ្ធផលនានា នៅវិទ្យាល័យ ហ៊ុន សែន ព្រែកអាជី ក្នុងស្រុកក្រូចឆ្មារ ខេត្តត្បូងឃ្មុំ។
ពិធីនេះក៏មានការអញ្ជើញចូលរួមពី ឯកឧត្តម គង់ ភឿន ប្រធាននាយកដ្ឋានផ្លូវ នៃក្រសួងរៀបចំដែនដី នគររូបនីយកម្ម និងសំណង់ ឯកឧត្តម លោកជំទាវ លោក លោកស្រី ប្រតិភូអមដំណើរ ប្រធាន-អនុប្រធានមន្ទីរជំនាញពាក់ព័ន្ធ ជុំវិញខេត្ត តំណាងកងកម្លាំងទាំង ៣ អភិបាល អភិបាលរងស្រុក ក្រុមប្រឹក្សាស្រុក អាជ្ញាធរមូលដ្ឋាន គណៈគ្រប់គ្រង លោកគ្រូ អ្នកគ្រូ មាតាបិតាអ្នកអាណាព្យាបាល និងក្មួយ ៗសិស្សានុសិស្សជាច្រើនរូប។
ថ្លែងក្នុងឱកាសននេះ ឯកឧត្តម ផារ៉ា មង្គល បានពាំនាំនូវការសួរសុខទុក្ខពីសំណាក់ថ្នាក់ដឹកនាំកំពូលៗ រួមមាន សម្តេចតេជោ ហ៊ុន សែន ប្រធានព្រឹទ្ធសភាកម្ពុជា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនចំពោះបងប្អូនប្រជាពលរដ្ឋស្រុកក្រូចឆ្មារ។ បន្ថែមលើនេះ ឯកឧត្តមក៏បាននាំមកនូវមនោសញ្ចេតនានឹករលឹកពីសំណាក់ ឯកឧត្តម ជា សុផារ៉ា ដែលជានិច្ចកាលតែងតែណែនាំឱ្យក្រុមការងារយកចិត្តទុកដាក់ខ្ពស់លើការថែរក្សាសមិទ្ធផលរូបវន្ត និងបន្តជំរុញការអភិវឌ្ឍមូលដ្ឋានឱ្យកាន់តែរីកចម្រើន។
ឯកឧត្តមរដ្ឋលេខាធិការ ក៏បានសម្តែងនូវការកោតសរសើរចំពោះការផ្ដួចផ្ដើមដឹកនាំរបស់ ឯកឧត្តម គង់ ភឿន ចំពោះការជួយជ្រោមជ្រែងក្នុងការបង្កើតនូវសមិទ្ធផលសម្រេចបាននូវអគារសិក្សាថ្មីនេះ។
ឯកឧត្តម បានគូសបញ្ជាក់ថា ចំណេះដឹងគឺជាគ្រឹះដ៏សំខាន់សម្រាប់យុវជន ដើម្បីក្លាយជាសរសរទ្រូងជាតិ ព្រមទាំងបានអំពាវនាវឱ្យសិស្សានុសិស្សខិតខំប្រឹងប្រែងសិក្សារៀនសូត្រ គោរពវិន័យ ស្តាប់ដំបូន្មានឪពុក ម្តាយ លោកគ្រូ អ្នកគ្រូ និងជៀសឆ្ងាយពីគ្រឿងញៀន ចូលរួមគោរពច្បាប់ចរាចរណ៍។
ឯកឧត្តម ផារ៉ា មង្គល បានធ្វើការផ្តាំផ្ញើ និងសំណូមពរឱ្យអាជ្ញាធរ និងកងកម្លាំងមានសមត្ថកិច្ច បង្កើនការអនុវត្តគោលនយោបាយភូមិ ឃុំ សង្កាត់មានសុវត្ថិភាព ឲ្យមានប្រសិទ្ធភាពខ្ពស់ ដើម្បីធានាបានសុខសុវត្ថិភាពជូនប្រជាពលរដ្ឋ និងសិស្សានុសិស្ស ព្រមទាំងត្រូវបន្តចុះមូលដ្ឋានដោះស្រាយបញ្ហានានាជូនប្រជាពលរដ្ឋឱ្យបានជាប់ជាប្រចាំ។
ក្រោមការយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋ និងការលើកកម្ពស់វិស័យអប់រំ ឯកឧត្តម ផារ៉ា មង្គល បាននាំយកនូវអំណោយសប្បុរសធម៌ ចែកជូនដល់សិស្សានុសិស្សចំនួន ៥៤៧នាក់ ម្នាក់ៗទទួលបាន សម្ភារសិក្សាមួយកញ្ចប់ (សៀវភៅ, ប៊ិច, បន្ទាត់) និងថវិកា ៥,០០០រៀល, លោកគ្រូ អ្នកគ្រូ ចំនួន ៥៨នាក់ ម្នាក់ៗទទួលបាន ដបទឹកសុខភាព និងថវិកា ១០,០០០រៀល, អាជ្ញាធរ គ្រូពេទ្យ និងកងកម្លាំង (៩៥នាក់) ម្នាក់ៗទទួលបាន ក្រមាខ្មែរ ១ និងថវិកា ១០,០០០រៀល, ប្រជាពលរដ្ឋ និងមាតា បិតា សិស្ស ចំនួន ៣០០នាក់ ម្នាក់ៗទទួលបាន ក្រមាខ្មែរ ១ និងថវិកា ១០,០០០រៀល ផងដែរ។
គូសបញ្ជាក់បន្ថែមថា សិមិទ្ធផលដែលសម្ពោធក្នុងថ្ងៃនេះរួមមានអាគារសិក្សាថ្មី ១ខ្នង កម្ពស់ ២ជាន់ (១២បន្ទប់), កន្លែងលាងដៃ ចំនួន ២កន្លែង, ក្លោងទ្វា, របង, រោងកង់-ម៉ូតូ និងផ្លូវបេតុងចូលវិទ្យាល័យ ហ៊ុនសែន ព្រែកអាជី ប្រវែង ៤២៣ម៉ែត្រ សម្រាប់ឱ្យបងប្អូនប្រជាពលរដ្ឋ ប្អូនៗសិស្សានុសិស្ស ក្នុងឃុំព្រែកអាជី ស្រុកក្រូចឆ្មារ ខេត្តត្បូងឃ្មុំប្រើប្រាស់ផងដែរ៕
