នៅថ្ងៃទី៩ ខែមីនា ឆ្នាំ២០២៦ មានប្រារព្ធពិធីចុះហត្ថលេខាលើអនុស្សរណៈយោគយល់គ្នា (MoU) នេះ រវាងខេត្តត្បូងឃ្មុំ និងទីក្រុងរ៉ូឆេស្ទ័រ (Rochester) រដ្ឋមីនីសូតា ក្រោមអធិបតីភាព ឯកឧត្តម ឯកឧត្តម កុយ គួង ឯកអគ្គរាជទូតកម្ពុជាប្រចាំសហរដ្ឋអាមេរិក ។
ការចុះហត្ថលេខាលើអនុស្សរណៈយោគយល់គ្នា (MoU) នេះ គឺដើម្បីបង្កើត ទីក្រុងសម្ព័ន្ធមេត្រីភាព រវាងខេត្តត្បូងឃ្មុំ និងទីក្រុងរ៉ូឆេស្ទ័រ (Rochester) រដ្ឋមីនីសូតា ដែលជាជំហានយុទ្ធសាស្ត្រមួយក្នុងការបង្កើនកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ទេសចរណ៍ និងការផ្លាស់ប្តូរវប្បធម៌ ដើម្បីលើកកម្ពស់មិត្តភាព និងការអភិវឌ្ឍប្រកបដោយចីរភាព។
លោកស្រី ប៊ិនលី សុគន្ធា តំណាងភាគីទីក្រុង Rochester បានចាត់ទុកទំនាក់ទំនងនេះថាជា “ស្ពានចម្លង” ដ៏រឹងមាំរវាងកម្ពុជា និងសហរដ្ឋអាមេរិក ដែលនឹងនាំមកនូវផលប្រយោជន៍ជាក់ស្តែងសម្រាប់យុវជន និងសហគ្រិននៃសហគមន៍ទាំងពីរ។
ក្នុងឱកាសនេះ ឯកឧត្តម កុយ គួង ឯកអគ្គរាជទូតកម្ពុជាប្រចាំសហរដ្ឋអាមេរិក និងម៉ិចស៊ិច បានសម្តែងនូវការកោតសរសើរ និងវាយតម្លៃខ្ពស់ចំពោះរដ្ឋបាលខេត្តត្បូងឃ្មុំ ដែលបានខិតខំអភិវឌ្ឍ “ខេត្តកូនពៅ” មួយនេះ ឱ្យមានការរីកចម្រើនយ៉ាងឆាប់រហ័សគួរជាទីមោទនៈ។
ឯកឧត្តមបានគូសបញ្ជាក់បន្ថែមថា ចំណងសម្ព័ន្ធមេត្រីភាពនេះ នឹងកាន់តែរឹតបន្តឹងទំនាក់ទំនងគ្រប់ជ្រុងជ្រោយរវាងទីក្រុងនៃប្រទេសទាំងពីរ ជាពិសេសលើការជំរុញវិស័យអប់រំ សុខាភិបាល និងការទាក់ទាញវិនិយោគទុន សំដៅប្រែក្លាយទំនាក់ទំនងនេះ ទៅជាផ្លែផ្កា ជាក់ស្តែងស្របតាមផែនការអភិវឌ្ឍន៍នៃប្រទេសទាំងពីរ ៕
