(ត្បូងឃ្មុំ) ៖ ថ្ងៃទី២ ខែមេសា ឆ្នាំ២០២៦ រដ្ឋបាលខេត្តត្បូងឃ្មុំ សហការជាមួយអគ្គនាយកដ្ឋានរដ្ឋបាល នៃក្រសួងមហាផ្ទៃ បានរៀបចំវគ្គបណ្តុះបណ្តាល និងសិក្ខាសាលាផ្សព្វផ្សាយស្តីពី «តួនាទី ភារកិច្ចរបស់ការិយាល័យប្រជាពលរដ្ឋ និងលិខិតបទដ្ឋានគតិយុត្តនានា»ពាក់ព័ន្ធនឹងការងាររបស់ការិយាល័យប្រជាពលរដ្ឋខេត្ត ដើម្បីពង្រឹងសមត្ថភាពមន្ត្រីក្នុងការដោះស្រាយបណ្តឹង និងការផ្តល់ព័ត៌មានជូនប្រជាពលរដ្ឋតាមរយៈប្រព័ន្ធ App “មតិយើង” ឱ្យកាន់តែមានប្រសិទ្ធភាព តម្លាភាព និងមានស្តង់ដារតែមួយនៅទូទាំងប្រទេស។
ពិធីនេះប្រព្រឹត្តទៅក្រោមអធិបតីភាព ឯកឧត្តម ឡុង ធាម ប្រធានក្រុមប្រឹក្សាខេត្តត្បូងឃ្មុំ, ឯកឧត្តម ម៉ាត់ ហ្គោហ្វូត អភិបាលរងខេត្ត តំណាង ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ និង លោកស្រី ហ៊ាង ឆយី អនុប្រធាននាយកដ្ឋានមុខងារ និងធនធាន នៃអគ្គនាយកដ្ឋានរដ្ឋបាល ក្រសួងមហាផ្ទៃ នៅសាលប្រជុំរំដួល ។ ពិធីនេះមានការអញ្ជើញចូលរួម ពីប្រតិភូតំណាងក្រសួង ឯកឧត្តម លោកជំទាវ សមាជិកក្រុមប្រឹក្សាខេត្ត លោកស្រី ទៀង រស្ម៉ី ប្រធានការិ.ប្រជាពលរដ្ឋខេត្ត លោក-លោកស្រី ប្រធាន-អនប្រធានមន្ទីរអង្គភាពជុំវិញខេត្ត កងកម្លាំងទាំង បី ប្រភេទ រដ្ឋបាលក្រុង/ស្រុក ឃុំ/សង្កាត់ និងពាក់ព័ន្ធជាច្រើនរូប។
ឯកឧត្តម ម៉ាត់ ហ្គោហ្វូត បានប្រសាសន៍ស្វាគមន៍ និងបានលើកឡើងថា ការឈានជើងចូលមកដល់នៃបច្ចេកវិទ្យាឌីជីថលក្នុងប្រព័ន្ធរដ្ឋបាលសាធារណៈ គឺជាជំហានដ៏វិជ្ជមានមួយក្នុងការលើកកម្ពស់អភិបាលកិច្ចល្អ និងគណនេយ្យភាព។ ឯកឧត្តមបានបញ្ជាក់ថា កម្មវិធីទូរស័ព្ទដៃ “មតិយើង” និងប្រព័ន្ធគ្រប់គ្រងទិន្នន័យបណ្តឹងថ្មីនេះ នឹងក្លាយជាស្ពានចម្លងដ៏សំខាន់ ក្នុងការផ្សារភ្ជាប់ទំនាក់ទំនងរវាងរដ្ឋបាលថ្នាក់ក្រោមជាតិ ជាមួយប្រជាពលរដ្ឋឱ្យកាន់តែខិតជិតគ្នា ងាយស្រួលក្នុងការទទួលយកមតិរិះគន់ដើម្បីស្ថាបនា និងដោះស្រាយរាល់សំណូមពរ បណ្តឹងតវ៉ាផ្សេងៗបានទាន់ពេលវេលា និងមានតម្លាភាពបំផុត។
ឯកឧត្តម ម៉ាត ហ្គោហ្វូត ក៏បានផ្ដាំផ្ញើដល់សិក្ខាកាមដែលជាមន្ត្រីមកពីការិយាល័យប្រជាពលរដ្ឋតាមបណ្តាក្រុង/ស្រុក ទូទាំងខេត្តទាំងអស់ ត្រូវខិតខំក្រេបជញ្ជក់ចំណេះដឹងពីវគ្គតម្រង់ទិសនេះ ដើម្បីយកទៅអនុវត្តនៅតាមមូលដ្ឋានរៀងៗខ្លួនឱ្យមានប្រសិទ្ធភាពខ្ពស់ ឆ្លើយតបទៅនឹងតម្រូវការរបស់ប្រជាពលរដ្ឋក្នុងយុគសម័យឌីជីថល។
លោកស្រី ហ៊ាង ឆយី អនុប្រធាននាយកដ្ឋានមុខងារ និងធនធាន នៃអគ្គនាយកដ្ឋានរដ្ឋបាល ក្រសួងមហាផ្ទៃ បានមានប្រសាសន៍ថា វគ្គបណ្តុះបណ្តាលនេះ មានគោលបំណង ដើម្បីឱ្យសិក្ខាកាមយល់ឱ្យបានច្បាស់អំពីតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋរាជធានី-ខេត្ត, ទទួលបានចំណេះដឹងអំពីបែបបទ នីតិវិធីនៃការទទួល សម្រុះសម្រួលដោះស្រាយបណ្ដឹងរបស់ការិយាល័យប្រជាពលរដ្ឋរាជធានី ខេត្ត និងផ្តល់ជាចំណេះដឹងបន្ថែមលើច្បាប់ប្រឆាំងអំពើពុករលួយ និងការគ្រប់គ្រងរដ្ឋបាលរបស់រដ្ឋបាលរាជធានី ខេត្ត។
លោកស្រី អនុប្រធាននាយកដ្ឋាន បានបញ្ជាក់ថា ការងារនេះគឺជាផ្នែកមួយនៃយុទ្ធសាស្ត្របញ្ចកោណរបស់រាជរដ្ឋាភិបាល ក្នុងគោលដៅលើកកម្ពស់អភិបាលកិច្ចល្អ និងការកែទម្រង់រដ្ឋបាលសាធារណៈឱ្យទៅជាអ្នកផ្តល់សេវាដ៏មានប្រសិទ្ធភាព និងជាដៃគូអភិវឌ្ឍន៍ដែលប្រជាពលរដ្ឋអាចទុកចិត្តបាន សំដៅបម្រើដល់ប្រជាពលរដ្ឋឱ្យកាន់តែល្អប្រសើរឡើង។
ក្នុងឱកាសនេះ ឯកឧត្តម ឡុង ធាម ប្រធានក្រុមប្រឹក្សាខេត្ត បានលើកឡើងថា ការប្រើប្រាស់ App “មតិយើង” និងប្រព័ន្ធគ្រប់គ្រងទិន្នន័យថ្មីនេះ គឺជាជំហានដ៏សំខាន់ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល ក្នុងការប្រើប្រាស់បច្ចេកវិទ្យាដើម្បីបម្រើសេវាសាធារណៈឱ្យបានឆាប់រហ័ស និងមានតម្លាភាព។
ជាលទ្ធផលការងារ ឯកឧត្តមបានឱ្យដឹងថា គិតត្រឹមដើមឆ្នាំ២០២៦នេះ ការិយាល័យប្រជាពលរដ្ឋខេត្តត្បូងឃ្មុំ ទទួលបានបណ្តឹងសរុបចំនួន ៩៨ករណី។ ទោះបីជាមានការផ្លាស់ប្តូរថ្នាក់ដឹកនាំការិយាល័យកន្លងមក ប៉ុន្តែក្រោមការដឹកនាំរបស់លោកស្រី ទៀង រស្ម៉ី ប្រធានការិយាល័យប្រជាពលរដ្ឋខេត្តថ្មី សកម្មភាពការងារមានភាពល្អប្រសើរគួរឱ្យកត់សម្គាល់ ដែលឆ្លុះបញ្ចាំងពីការយកចិត្តទុកដាក់ខ្ពស់លើសុខទុក្ខរបស់ពលរដ្ឋ។
ឯកឧត្តមប្រធានក្រុមប្រឹក្សាខេត្ត ក៏បានលើកទឹកចិត្តដល់មន្ត្រីទាំងអស់ ត្រូវប្រកាន់ខ្ជាប់នូវគោលការណ៍គ្រឹះទាំង ០៥ គឺ “អព្យាក្រឹត តម្លាភាព យុត្តិធម៌ រក្សាការសម្ងាត់ និងចៀសវាងទំនាស់ផលប្រយោជន៍” ក្នុងការដោះស្រាយរាល់បណ្តឹងក្រៅប្រព័ន្ធតុលាការ។
ជាទីបញ្ចប់ ឯកឧត្តម ឡុង ធាម បានផ្តល់ការណែនាំដល់សិក្ខាកាមទាំងអស់ដែលជាមន្ត្រីថ្នាក់ខេត្ត ក្រុង ស្រុក និងឃុំ សង្កាត់ ត្រូវខិតខំក្រេបជញ្ជក់ចំណេះដឹងពីវគ្គបណ្តុះបណ្តាលនេះ ដើម្បីយកទៅអនុវត្តឲ្យមានប្រសិទ្ធភាព និងផ្សព្វផ្សាយបន្តដល់បងប្អូនប្រជាពលរដ្ឋនៅមូលដ្ឋាន ឱ្យបានយល់ដឹងពីរបៀបដាក់ពាក្យបណ្តឹង និងការផ្តល់មតិរិះគន់ស្ថាបនា តាមរយៈប្រព័ន្ធបច្ចេកវិទ្យាទំនើបនេះ៕
