(ត្បូងឃ្មុំ)៖ លោក ធីន ស៉ីថាច ប្រធានមន្ទីរព័ត៌មានខេត្តត្បូងឃ្មុំ នៅថ្ងៃទី២២ ខែឧសភា ឆ្នាំ២០២៦ នេះ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារបន្តសម្រាប់ខែមិថុនា ដើម្បីពង្រឹងគុណភាពប្រព័ន្ធផ្សព្វផ្សាយ និងឆ្លើយតបទៅនឹងរបត់បរិវត្តកម្មឌីជីថល ដែលកិច្ចប្រជុំនេះ ធ្វើឡើងនៅសាលប្រជុំមន្ទីរ។
កិច្ចប្រជុំនេះមានការអញ្ជើញចូលរួមពីសំណាក់លោក វ៉ាន់ វីរៈ និងលោក ស ស៉ីសុភត្រា អនុប្រធានមន្ទីរ ព្រមទាំងលោក-លោកស្រីប្រធាន អនុប្រធានការិយាល័យទាំង៥ និងមន្ត្រីរាជការ-មន្ត្រីជាប់កិច្ចសន្យានៃមន្ទីរព័ត៌មានខេត្តជាច្រើនរូប។
ក្នុងឱកាសនោះ លោក ធីន ស៊ីថាច បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគ្រប់លំដាប់ថ្នាក់ ដែលបានបំពេញភារកិច្ចសម្រេចបានលទ្ធផលល្អប្រសើរ គួរជាទីមោទក។ លោកប្រធានមន្ទីរគូសបញ្ជាក់ថា ស្នាដៃទាំងនេះបានរួមចំណែកយ៉ាងសកម្មជាមួយរាជរដ្ឋាភិបាល ក្នុងការចាប់យកកាលានុវត្តភាពថ្មីៗផ្នែកបច្ចេកវិទ្យា ខណៈដែលសង្គមកម្ពុជាកំពុងបោះជំហានទៅមុខយ៉ាងលឿនក្នុងយុគសម័យឌីជីថល។
អង្គប្រជុំក៏បានស្តាប់របាយការណ៍សង្ខេបពីសំណាក់ លោក ស ស៉ីសុភត្រា អនុប្រធានមន្ទីរ ដោយបានធ្វើបទបង្ហាញពីដំណើរការ នៃការអនុវត្តសាកល្បងគេហទំព័រ (Website) ថ្មីរបស់មន្ទីរ ដែលបានដាក់ឲ្យប្រើប្រាស់ពីក្រសួងព័ត៌មាន ក្រោមការគាំទ្របច្ចេកទេសពីក្រសួងប្រៃសណីយ៍ និងទូរគមនាគមន៍។ ជាមួយគ្នានេះ លោក វ៉ាន់ វីរៈ អនុប្រធានមន្ទីរ ក៏បានលើកពីស្មារតីនៃកិច្ចប្រជុំរួមមួយ ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន តាមកម្មវិធី Zoom ពីវឌ្ឍនភាព នៃយុទ្ធនាការប្រឆាំងព័ត៌មានក្លែងក្លាយ ដំណាក់កាលទី២ របស់ក្រសួងព័ត៌មាន ដែលផ្តោតសំខាន់លើការពង្រឹងអក្ខរកម្មព័ត៌មានក្នុងស្រទាប់យុវវ័យ។
ដើម្បីបន្តនិរន្តរភាពការងារឱ្យកាន់តែមានប្រសិទ្ធភាព លោកប្រធានមន្ទីរបានដាក់ចេញនូវទិសដៅយុទ្ធសាស្ត្រសំខាន់ៗ រួមមាន៖
– ពង្រឹងប្រព័ន្ធបច្ចេកវិទ្យា៖ ត្រៀមក្រុមការងារបច្ចេកទេសរបស់មន្ទីរ ដើម្បីបន្តអនុវត្តសាកល្បង និងការពារប្រព័ន្ធគេហទំព័រថ្មី ឱ្យមានសុវត្ថិភាពខ្ពស់។
– ពង្រីកអក្ខរកម្មព័ត៌មាន៖ ត្រៀមលក្ខណៈសកម្មក្នុងការអនុវត្តយុទ្ធនាការប្រឆាំងព័ត៌មានក្លែងក្លាយ ដំណាក់កាលទី២ សំដៅបង្កើនការយល់ដឹងដល់យុវជន។
– ការងារផ្សាយផ្ទាល់ព្រឹត្តិការណ៍ធំ៖ ត្រៀមសម្ភារៈ ឧបករណ៍ និងបច្ចេកទេសសម្រាប់ការផ្សាយផ្ទាល់ (Live) ក្នុងឱកាសទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ឆ្នាំ២០២៦ ខួបលើកទី១៦៣ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។
ជាចុងក្រោយ លោក ធីន ស៊ីថាច បានលើកទឹកចិត្តដល់មន្ត្រីក្រោមឱវាទទាំងអស់ ត្រូវខិតខំបន្តផលិតព័ត៌មាន និងកម្មវិធីថ្មីៗ ដែលគួរឱ្យជឿទុកចិត្តបាន ទាំងផ្នែកព័ត៌មាន អប់រំ និងកម្សាន្ត ដើម្បីផ្សព្វផ្សាយឱ្យបានទូលំទូលាយដល់មហាជនទូទាំងខេត្ត។ ទន្ទឹមនឹងនេះ លោកប្រធាន ក៏បានផ្តាំផ្ញើឱ្យថ្នាក់ដឹកនាំការិយាល័យ និងមន្ត្រីទាំងអស់ សូមក្សាសាមគ្គីភាពផ្ទៃក្នុងឱ្យបានរឹងមាំ ចេះចែករំលែក និងបែងចែកភារកិច្ចគ្នាដោយតម្លាភាព ក្នុងនាមជា «គ្រួសារតែមួយ» នៃមន្ទីរព័ត៌មានខេត្តត្បូងឃ្មុំ ដើម្បីសម្រេចភារកិច្ចជូនជាតិ និងប្រជាជនឱ្យបានទាន់ពេលវេលា និងមានប្រសិទ្ធភាពខ្ពស់បំផុត៕
