ត្បូងឃ្មុំ៖ រសៀលថ្ងៃទី២០ ខែមិថុនា ឆ្នាំ២០២៦ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញដឹកនាំសមាជិក សមាជិការ សហភាពសហព័ន្ធយុវជនកម្ពុជាតាមបណ្តារាជធានីខេត្តទាំង២៥ ធ្វើយុទ្ធដំណើរថ្មើរជើង១០គីឡូមែត្រ ទៅកាន់តំបន់យោធាប្រវត្តិសាស្ត្រតេជោកោះថ្ម X16 ដែលស្ថិតនៅក្នុងភូមិក្តុល ឃុំទន្លូង ស្រុកមេមត់ ខេត្តត្បូងឃ្មុំ។
យុទ្ធដំណើរដោយថ្មើរជើងនេះ ធ្វើឡើងក្នុងគោលបំណងដឹកនាំយុវជនឱ្យស្វែងយល់ពីរឿងរ៉ាវនិងប្រវត្តនៃការតស៊ូរបស់សម្តេចតេជោ ហ៊ុន សែន និងអតីតយុទ្ធមិត្តដែលបានលះបង់សាច់ស្រស់ ឈាមស្រស់ ក្នុងបុព្វហេតុស្វែងរកសន្តិភាព និងដំណើរឈានឆ្ពោះទៅការផ្តួលរំលំបាននៅរបបកាប់សម្លាប់ប្រជាជនខ្មែររាប់លានអ្នក របស់ពួក ប៉ុល ពត។
ក្នុងយុទ្ធដំណើរនេះមានរយៈពេល២ថ្ងៃគឺគិតចាប់ពីថ្ងៃទី២០-២១ ខែមិថុនា ឆ្នាំ២០២៦ ដោយនៅថ្ងៃទី២០ ខែមិថុនា ឆ្នាំ២០២៦ មានការដើរដោយថ្មើរជើងចំងាយ១០គីឡូម៉ែត្រ ពីសាលាបឋមសិក្សា ប៊ុនរ៉ានីហ៊ុនសែន កោះថ្ម ឆ្ពោះទៅកាន់តំបន់យោធាប្រវត្តិសាស្ត្រ តេជោកោះថ្ម X16 ដែលជាទីកន្លែងដែលសម្តេចតេជោ ហ៊ុន សែន និងយុទ្ធមិត្ត ធ្លាប់តស៊ូធ្វើដំណើរឆ្លងកាត់ក្នុងតំបន់នេះ ហើយទីនេះកាលពី៤៩ឆ្នាំមុនជាទីតាំងដែលជាដើមកំណើតនៃការសន្តិភាពដែលបានមកពីការតស៊ូយ៉ាងស្វិតស្វាញដើម្បីឈានឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ផងដែរ។
ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានដឹកនាំសមាជិក សមាជិការ សហភាពសហព័ន្ធយុវជនកម្ពុជាតាមបណ្តារាជធានីខេត្តទាំងអស់ ធ្វើដំណើរដោយថ្មើរជើង ទៅតំបន់ X16ហើយបានធ្វើការដុតធូបបួងសួងនៅទីតាំងព្រះអង្គគោកធ្លក បន្ទាប់មកបន្តដំណើរទៅបោះជុំរំសម្រាកនៅទីតាំងនោះ១យប់ផងដែរ ដោយក្នុងពេលយប់មានការទស្សនាវីដេអូរឿង«កូនប្រុសក្រោមពន្លឺព្រះចន្ទ» ដែលរឿងនេះគឺជាតឹកតាំងប្រវត្តិសាស្ត្រនៃការតស៊ូរបស់សម្តេចតេជោ ហ៊ុន សែន និងយុទ្ធមិត្ត កាលពី៤៩ឆ្នាំមុនផងដែរ បន្ទាប់ពីទស្សនារួចក៏មានការរៀបចំដុតនៅភ្លើងព្រះអគ្គីបំភ្លឺ ដើម្បីបង្ហាញថាពន្លឺនៃសន្តិភាពគឺកើតចេញពីការតស៊ូ ហើយពន្លឺនេះគឺប្រៀបដូចជាអនាគតភ្លឺស្វាងរបស់យុវជនជំនាន់ក្រោយផងដែរ។
ហើយនៅព្រឹកថ្ងៃទី២១ ខែមិថុនា ឆ្នាំ២០២៦ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក៏បានធ្វើការរៀប ចំពិធីបង្សុកូលឧទ្ទិសកុសលជូនវិញ្ញាណក្ខន្ធវីរកងទ័ពនិងឥស្សរជន អ្នក ស្នេហាជាតិ ដែលបានពលី ជីវិតក្នុងបុព្វហេតុជាតិមាតុភូមិ នៅ មហាចេតិយ ស្ថិតក្នុងតំបន់ប្រវត្តិសាស្ត្រកោះថ្មX16 ក្នុងខេត្តត្បូងឃ្មុំផងដែរ៕
អត្ថបទដោយ៖ ជឿន សុធន
