(ខេត្តត្បូងឃ្មុំ) ៖ នៅរសៀលថ្ងៃទី២០ ខែកក្កដា ឆ្នាំ២០២៦ នេះ ឯកឧត្តម ប៉ែន កុសល្យ អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តត្បូងឃ្មុំ បានអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត នៅសាលប្រជុំ (ក) សាលាខេត្ត ដោយមានការចូលរួមពីអភិបាលរងខេត្ត ថ្នាក់ដឹកនាំសាលាដំបូង មេបញ្ជាការកងកម្លាំងប្រដាប់អាវុធទាំងបីប្រភេទ ប្រធានពន្ធធនាគារ សាខាគយ និងរដ្ឋាករខេត្ត នាយក-នាយករងរដ្ឋបាល នាយក-នាយករងទីចាត់ការ ប្រធានអង្គភាពចំណុះសាលាខេត្ត ប្រធានមន្ទីរ-អង្គភាពជុំវិញខេត្ត អភិបាលក្រុង-ស្រុក ព្រមទាំងមន្ត្រីរាជការ និងអ្នកពាក់ព័ន្ធជាច្រើនរូបទៀត។
ក្នុងឱកាសនោះ ឯកឧត្តម ប៉ែន កុសល្យ បានថ្លែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អាជ្ញាធរ និងកងកម្លាំងគ្រប់លំដាប់ថ្នាក់ ដែលបានខិតខំយកចិត្តទុកដាក់បំពេញការងារស្របតាមតួនាទី ភារកិច្ចរបស់ខ្លួន ក្នុងស្មារតីទទួលខុសត្រូវខ្ពស់ ធ្វើឱ្យរដ្ឋបាលខេត្ដ សម្រេចបាននូវសមិទ្ធផលជាច្រើនគួរជាទីមោទនៈ ទាំងការអភិវឌ្ឍន៍ខេត្ដ និងការធានាស្ថិរភាពនយោបាយ សន្ដិសុខសង្គម សុខសុវត្ថិភាពសណ្ដាប់ធ្នាប់សាធារណៈ បានយ៉ាងល្អប្រសើរ ។
ទោះជាយ៉ាងណា ដើម្បីពង្រឹងសន្តិសុខ និងជម្រុញការអភិវឌ្ឍមូលដ្ឋានឱ្យកាន់តែមានប្រសិទ្ធភាពខ្ពស់ ឯកឧត្តម ប៉ែន កុសល្យ អភិបាលខេត្ត បានដាក់ចេញនូវបទបញ្ជាម៉ឺងម៉ាត់ និងទិសដៅការងារចំពោះមុខចំនួន ៩ ចំណុច ដូចខាងក្រោម៖
១. បោសសម្អាត Online Scams និងគ្រឿងញៀន៖ បញ្ជាឱ្យកងកម្លាំង និងអាជ្ញាធរក្រុង-ស្រុក ចុះពិនិត្យការស្នាក់នៅរបស់ជនបរទេសតាមសណ្ឋាគារ និងផ្ទះជួល ដើម្បីលុបបំបាត់ការឆបោកតាមប្រព័ន្ធបច្ចេកវិទ្យា (Online Scams) ព្រមទាំងបង្ក្រាបគ្រឿងញៀន ក្មេងទំនើង និងទប់ស្កាត់ការនាំចូលសាច់បង្កកខូចគុណភាពតាមព្រំដែន។
២. ការពារការប្រឡងបាក់ឌុប ឆ្នាំ២០២៦៖ ត្រូវធានាសន្តិសុខ ចរាចរណ៍ អគ្គិសនី និងប្រព័ន្ធសេវាទូរស័ព្ទនៅតាមមណ្ឌលប្រឡង។ រៀបចំកន្លែងផ្ញើម៉ូតូឥតគិតថ្លៃ (ស.ស.យ.ក) ត្រៀមរថយន្តសង្គ្រោះបន្ទាន់ និងទីវត្តអារាមសម្រាប់បេក្ខជនខ្វះខាតកន្លែងស្នាក់នៅ។
៣. អន្តរាគមន៍បន្ទាន់បញ្ហាច្រាំងទន្លេបាក់ស្រុត៖ បង្កើតគណៈកម្មការដឹកនាំដោយ ឯកឧត្តម ហុក ពេជ្រហោះ សហការជាមួយមន្ទីរធនធានទឹក និងស្រុកជាប់ទន្លេ (ក្រូចឆ្មារ, ត្បូងឃ្មុំ, អូររាំងឪ) ដើម្បីវាយតម្លៃតំបន់ប្រឈម និងត្រៀមសម្ភារៈសង្គ្រោះក្នុងរដូវទឹកឡើង។
៤. ពន្លឿនការចុះបញ្ជីដីធ្លី៖ ជំរុញយុទ្ធនាការចុះបញ្ជីដីធ្លីជូនប្រជាពលរដ្ឋ និងដីរដ្ឋ ព្រមទាំងដោះស្រាយទំនាស់ក្រៅប្រព័ន្ធតុលាការឱ្យបានទាន់ពេលវេលា។
៥. បង្ក្រាបបទល្មើសធនធានធម្មជាតិ៖ ត្រូវបង្ក្រាបដាច់ខាតនូវបទល្មើសព្រៃឈើ ជលផល និងអណ្តូងរ៉ែខុសច្បាប់ នៅតំបន់បឹងការដេរ ព្រៃលិចទឹក និងបឹងក្រពិត។
៦. ជំរុញការធ្វើអត្តសញ្ញាណបណ្ណ៖ ផ្ដោតលើការធ្វើអត្តសញ្ញាណបណ្ណសញ្ជាតិខ្មែរជូនពលរដ្ឋគ្រប់អាយុ និងអ្នកហួសសុពលភាព ដើម្បីត្រៀមសម្រាប់ការបោះឆ្នោតនាពេលខាងមុខ។
៧. ពង្រឹងសេវាច្រកចេញចូលតែមួយ៖ លើកកម្ពស់ប្រសិទ្ធភាព និងតម្លាភាពក្នុងការផ្តល់សេវាសាធារណៈជូនប្រជាពលរដ្ឋគ្រប់កម្រិត។
៨. ពង្រឹងរបៀបរបបការងារ៖ កងកម្លាំង និងមន្ទីរជំនាញត្រូវឆ្លើយតប និងអនុវត្តរាល់បទបញ្ជារបស់រដ្ឋបាលខេត្តឱ្យបានទាន់ពេលវេលា និងប្រកបដោយស្មារតីទទួលខុសត្រូវខ្ពស់។
៩. បើកទូលាយការពិភាក្សា៖ ផ្ដល់ឱកាសដល់អង្គប្រជុំឡើងមតិយោបល់ ដើម្បីដោះស្រាយបញ្ហាប្រឈមនានាដែលនៅសេសសល់។
មុននឹងបញ្ចប់ ឯកឧត្តម ប៉ែន កុសល្យ បានសង្កត់ធ្ងន់យ៉ាងម៉ឺងម៉ាត់ថា គ្រប់ភាគីពាក់ព័ន្ធទាំងអស់ត្រូវតែសហការគ្នា អនុវត្តបទបញ្ជាទាំង ៩ ចំណុចនេះឱ្យមានប្រសិទ្ធភាពខ្ពស់បំផុត ដើម្បីបម្រើផលប្រយោជន៍ដ៏ពិតប្រាកដជូនប្រជាពលរដ្ឋ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា៕
សម្របសម្រួលព័ត៌មានដោយ៖ អារុណ្ណាទី
